सचेत युवा समूह फुलबारीद्वारा उपचाररत नगेन्द्र श्रेष्ठलाई ९५ हजार ८५० रुपैयाँ सहयोग हस्तान्तरण

झापा। ताप्लेजुङको आठराई त्रिवेणी गाउँपालिका–०२ फुलबारी घर भई हाल झापामा बसोबास गर्दै आउनुभएका नगेन्द्र प्रसाद श्रेष्ठको उपचारका लागि सचेत युवा समूह फुलबारीले ९५ हजार ८५० रुपैयाँ आर्थिक सहयोग हस्तान्तरण गरेको छ।

फुलबारी साविक वडा नं. ६ निवासी श्रेष्ठ केही महिनाअघि घाँस काट्ने क्रममा रुखबाट लडेर गम्भीर घाइते हुनुभएको थियो। शरीरमा गम्भीर चोटपटक लागेपछि उहाँको शल्यक्रिया गरिएको भए पनि घाउ पूर्ण रूपमा निको नभएको र चिकित्सकको सल्लाहअनुसार थप उपचार आवश्यक रहेको जनाइएको छ। हाल उहाँ प्रादेशिक अस्पताल भद्रपुर (मेची) मा उपचाररत हुनुहुन्छ।

पारिवारिक आर्थिक अवस्था कमजोर भएका कारण उपचारमा समस्या भएपछि श्रेष्ठका परिवारले सचेत युवा समूह फुलबारीसमक्ष सहयोगका लागि आग्रह गरेका थिए। सोही आग्रहपछि समूहले देश–विदेशमा रहेका फुलबारीवासी, आफन्तजन, शुभेच्छुक तथा सहयोगी मनहरूबाट आर्थिक सहयोग संकलन अभियान सञ्चालन गरेको हो।

समूहका अनुसार विभिन्न सहयोगीहरूबाट संकलित कुल ९५ हजार ८५० रुपैयाँ उपचाररत श्रेष्ठ र उहाँका परिवारलाई प्रादेशिक अस्पताल भद्रपुर (मेची) मै पुगेर हस्तान्तरण गरिएको हो।

सहयोग रकम हस्तान्तरणका क्रममा सचेत युवा समूह फुलबारीका प्रतिनिधिहरू टंक बिमली, प्रेम श्रेष्ठ, भीम सेन्दाङ, विष्णु तामाङ, बुद्धराज सेन्दाङ र ईशा श्रेष्ठको उपस्थिति रहेको थियो। साथै भद्रपुर–०५ का युवा समाजसेवी बासु बानको समेत सहभागिता रहेको थियो।

“फूलबारीका सचेत युवाको एउटै सारः सकारात्मक सोच, समृद्ध समाजको आधार” भन्ने नाराका साथ सामाजिक कार्यमा सक्रिय सचेत युवा समूह फुलबारीले बिरामी श्रेष्ठको शीघ्र स्वास्थ्यलाभको कामना गर्दै सहयोग अभियानमा जोडिनुहुने सम्पूर्ण सहयोगीहरूलाई धन्यवाद व्यक्त गरेको छ।

समूहले संकटको समयमा गरिने मानवीय सहयोग नै समाजको वास्तविक पहिचान भएको उल्लेख गर्दै आर्थिक रूपमा कमजोर अवस्थामा रहेका बिरामी तथा पीडित परिवारका लागि सामूहिक सहयोग अत्यन्त महत्वपूर्ण हुने जनाएको छ।

सचेत युवा समूह फुलबारीले देश तथा विदेशबाट सहयोग गर्नुहुने सम्पूर्ण सहयोगी मनहरूप्रति आभार व्यक्त गर्दै संकलित रकमले नगेन्द्र श्रेष्ठको उपचारमा केही राहत पुग्ने विश्वास व्यक्त गरेको छ।

 

सहयोगी हातहरू