झापा । झापाको दमक नगरपालिका कार्यालयकै अगाडि प्रतिबन्धित लागुऔषध हिरोइनसहित एक युवा प्रहरीको नियन्त्रणमा परेका छन्।
इलाका प्रहरी कार्यालय दमकले सोमबार दमक नगरपालिका–६ स्थित नगरपालिकाको मुख्य कार्यालय परिसर अगाडि गोप्य सूचनाको आधारमा अभियान सञ्चालन गरी उक्त युवालाई नियन्त्रणमा लिएको हो।
पक्राउ परेका युवाको परिचय पाँचथर जिल्लाको फाल्गुनन्द गाउँपालिका–७ का २५ वर्षीय सुजन नेम्बाङ रहेको जिल्ला प्रहरी कार्यालय झापाले जनाएको छ।
दमक नगरपालिकाको कार्यालय परिसरमा खुलेआम लागुऔषध किनबेच भइरहेको गोप्य सूचना प्राप्त भएपछि इलाका प्रहरी कार्यालय दमकबाट एक प्रहरी टोली खटाइएको थियो। सोमबार उक्त स्थानमा शंकास्पद अवस्थामा हिँडिरहेका नेम्बाङलाई प्रहरीले रोकी तलासी लिएको थियो। तलासीका क्रममा नेम्बाङले लगाएको पाइन्टको बायाँ खल्तीभित्र प्लास्टिकमा सावधानीपूर्वक पोका पारी लुकाइराखेको अवस्थामा ४ ग्राम ५१० मिलिग्राम खैरो हिरोइन फेला परेको प्रहरीले जनाएको छ।
बरामद लागुऔषधसहित नेम्बाङलाई इलाका प्रहरी कार्यालय दमकमा राखिएको छ। घटनाबारे थप अनुसन्धान जारी रहेको प्रहरीले जनाएको छ। सरकारी कार्यालयकै अगाडि लागुऔषध कारोबार हुनु गम्भीर विषय भएकाले प्रहरीले यस घटनालाई प्राथमिकताका साथ अनुसन्धान गरिरहेको बताइएको छ।
